Ordføraren si side

Eg byrjar etter kvart å komme inn i rolla som ordførar i Midsund kommune. Dei første månadane har vore krevjande, ja kan hende meir krevjande enn forventa. Men dette trur eg ikkje berre gjeld ordføraren, men og alle andre nye politikarar. Det er krevjande å komme inn som ny politikar der den første viktige saka vi skulle ta stilling til var budsjett for 2012 og økonomiplan for 2012-2015. Men vi kom oss gjennom dette og klarte å skåne innbyggjarane for eigedomskatt utan dei altfor store kutta i tenestetilbodet.

Ordførarrolla er svært spanande og det har så langt vore mange nye ting å få vare med på. Vi skal i gang med bygging av nye PU-bustader for ferdigstilling medio mai 2013, ny veg / tilrettelegging for nye bustader i Selvik II feltet, parkeringsplass ved Fjellsenden og liknande. Andre viktige saker er reguleringsplana for sentrum samt planar om bygging av Midsund kompetansesenter der næringslivet i Midsund kan få kontorplass, saman med administrasjonen i kommunen.

Viktige utrykk for aktivitet og utvikling er: samspel, samhandling og innovasjon.

Eg vil at dei som har gode idear, dei som har noko på hjartet eller dei som rett og slett vil ha ein prat, tek turen til kommunehuset.

Nye og spanande prosjekt i framtida vil og komme til å påverke økonomien til kommunen der stikkord som samhandlingsreform, kommunikasjonar, interkommunalt samarbeid og nyskaping av arbeidsplassar vil heilt sikkert bli tema vi må ta stilling til i denne perioden.

Målet for året er at vi skal ut av ROBEK-si liste og at vi kan klare og halde oss vekk frå den i all framtid. For å kunne få til dette, så er målet å kunne sette av pengar årlig til disposisjonsfondet og da må vi bli betre til å kunne styre kommunen etter budsjett som kommunestyret har vedteke.

Med helsing

Einar Øien